സ്നേഹം

അറിയാതെ ഒഴുകുമീ കാല പ്രവാഹത്തില്‍
സ്നേഹമാം ചിപ്പികള്‍ തേടി അലയുമീ
പാവമാം ജീവ കണിക മാത്രം
ഞാന്‍ മായയാം മാനുഷ ജന്മം മാത്രം

ഇരുളില്‍ കിടക്കുമ്പോള്‍ ഒരു ഗോള രൂപമായ്‌
ആദ്യമായ്‌ സ്നേഹത്തെ ഞാനറിഞ്ഞു
പകരമായി നല്‍കുവാന്‍ എന്കയ്യില്‍ എന്തുള്ളു
വേദനിപ്പിക്കുമൊരു പടിയിറക്കം

അമ്മിഞ്ഞപ്പാലിന്റെ മാധുര്യം ആദ്യമായി
നുകരുമാ മാധുര്യ നിമിഷങ്ങളില്‍
മാധുര്യം ഊറുമാ സ്നേഹത്തെ ഞാന്‍
ഒരു രുചിഭേതമായ് തിരിച്ചറിഞ്ഞു

പിച്ചവെക്കുന്നൊരു പിഞ്ചു ബാല്യത്തില്‍
മനസ്സിനോടൊപ്പം തുടങ്ങുന്ന യാത്രയില്‍
അടിതെറ്റി വീഴുന്ന അത്യാഹിതങ്ങളില്‍
ഒരു കൈതാങ്ങലായ് ഞാനറിഞ്ഞു

നാക്കിനെ തഴുകിയ ആദ്യാക്ഷരങ്ങളായി
മണ്ണിലെ വിരല്‍ സ്പര്‍ശം അക്ഷര ദീപമായി
ഒഴുകിവരും അറിവിന്റെ ഉത്ഭവ സ്ഥാനമായി
അക്ഷര സ്നേഹമായ് ഞാനറിഞ്ഞു

അവര്‍ണനീയമാം ചെതോവികാരമെ
സ്നേഹമേ അഖിലാണ്ട ചൈതന്യ സത്യമേ
സ്നേഹത്തോടെ എഴുതുന്നു പഥികന്‍ ആകുമീ ഞാനും
സ്നേഹമാണഖിലസാരമൂഴിയില്‍